New Informate 2 hours wey don pass
Nigeria President Muhammadu Buhari dey Lagos state to launch di Mobolaji Johnson Railway station for Ebute-Metta Lagos.
Wit am na Govnors of Lagos state Babajide Sanwo-Olu, Oyo state govnor, Seyi Makinde, Minister for Transportation, Rotimi Amaechi, Minister for Works, Babatunde Fashola plus oda top politicians for di kontri.
Di 156km Lagos – Ibadan standard guage standard railway for Lagos wey di president dey commission na di first double track standard gauge railway for West Africa and di first Nigerian railway line wey di administration of President Muhammadu Buhari bin initiate for 196.
Plenty security officers’ wey consist of military and para-military full ground to provide tight security.
Presidential aide to di president Bashir Ahmad wey confam di news on Wednesday say: “Construction start March 2017, and test-running begin for December 2020,”
“Di Ebute Metta Station, wey pipo sabi as Mobolaji Johnson Station, na di largest railway station for West Africa with a holding capacity of 6000 passengers.
“President Buhari dey committed to developing a modern national railway network wey go connect every part of Nigeria, and promote trade, travel, tourism, commerce and national integration.” E tok.
Afta dia, di president dey expected to move to di Energy Nature Light Terminal for di Apapa Port to also commission di Integrated National Security and Waterways Protection Infrastructure, AKA Deep Blue Project.